أمراض رجل مهم

أمراض رجل مهم ..
اي واحد مهم معرض لأمراض الشهرة و الاحساس بالاهمية..

اصل السلطة زي ما ممكن يبقوا نعمة ممكن يبقوا لعنة ..

و الكلام لأي واحد يشغل اي منصب مهما كان صغير .. و الاهم اي مسؤل في الخدمة حتي لو كان بسيط
(و دول اللي يهموني اكتر في المقال ده)

و للاسف استاذ “مشهور المغرور” موجود في كل مكان ، و ماحدش كبير علي المرض ده ..

المرض الأول : الاحساس بالاهمية ، و أن دوره لا يمكن الاستغناء عنه ..

التاني عدم القدرة أو عدم الرغبة في سماع اي رأي معارض أو مكمل أو حتي مفيد ..

التالت جذب المنتفعين و المنافقين و “المداحين” ، اللي بيتلموا حواليك ، و يحوطوا عليك و يحجزوا الناس عنك ، و يحسسوك أن اي حد غيرهم لا يحبك و بيغير منك .. و دول علي فكرة اللي ح يبيعوك علي اول ناصية لما ييجي اللي بعدك !!

الرابع الانفراد بالرأي و عدم استشارة الحكماء و المخلصين، و الإصرار علي الرأي حتي لو كان مضر أو ثبت عدم جدواه ، و الاحساس بالالهام في ما تقول و ما تفعل ..

الخامس الغضب الذي يصل الي التشفي و الانتقام من كل من لا يثبت طاعته ، و الاحساس انك “مرصود” و “محسود” و “محل غيرة الناس” ، و بالتالي يزداد نفورك من الناس و نفور الناس منك ، و يبتعد الأصدقاء الأمناء و المخلصين ، و تزداد غرقا في بركة العزلة وحدك أو مع اللي سبق و غرقوك..

السادس عشق الصور و التصوير و الميكروفونات و لقاء المشاهير، و تحب الكلام عن نفسك و خبراتك و إنجازاتك، و تحب التصفيق و المديح ، و انتهاز كل فرصة لمهاجمة معارضيك و إلقاء التهم عليهم في العلن ..

سابعا : الخلط بين رايك الشخصي و رأي الحكماء و العظماء و أحيانا مع رأي الله نفسه..

ثامنا : عشق الوعظ و النصايح و اللي تتميز بالتعالي و عدم الواقعية و البعد عن حياة الناس ..

تاسعا : فرض الوصاية و الرغبة الجارفة في التدخل في حياة الناس لأنك تعرف اكتر منهم في كل حاجة..

عاشرا: يموت لو اتحرم من سلطاته اللي يقعد يدافع عنها و يبين انه تعب و عاوز يرتاح ..

اي مكانة سلطة هي من الله ، لأنه صاحب السلطان الأعلي، و بيمنح من يده توكيل للي يختاره لينوب عنه..

و كل ما تتواضع أمام الله و تخدم الناس كل ما اخدت بركة السلطة بدل من امراضها و اتعابها و مشاكلها..

عرفتوا ليه ، الحكماء و الاتقياء بيهربوا من السلطة؟؟ و عرفتوا ليه لازم تتأكد أن السلطة مسؤولية أمامه تاخدها منه و تكملها في رضاه؟؟
القس / مجدى خلة
فايبر وواتس اب
00201157683231

Comments

comments