عطوا العشور وجربوني

أعطوني العشور وجربوني..

أول إمبارح شخص بعت 1100 ( ألف ومائة جنية ) عشان عطايا العيد لأخوة المسيح وقال لي من فضلك صليلي عشان أنا في أزمة مادية طاحنة بقالي ست سنين …

حاولت أشجعه فقلت له ربنا معاك ومش هيسيبك أبداً ..

قاللي ماهو أنا مش عايز أتوقف عن العطاء لأن هو بالفعل معايا ومش سايبني أبداً وبيعمل معايا حاجات عجيبة فوق ما تتخيل !

سألته بيعمل معاك حاجات زي أيه ؟؟

قاللي كان عندي قضية بسبب ديون لشخص معين وروحت المحكمة أنا والمحامي بتاعي عشان أنا والدائن إتفقنا نعمل مصالحة ..

لما دخلت قاعة المحكمة ، المحامي قاللي لما يدخل القاضي لازم هتدخل القفص أثناء الجلسة ..

قلت للمحامي بس دي حاجة صعبة عليا أوي ، أنا راجل دكتور ودخولي القفص هيتعبني نفسياً جداً ?

المحامي قاللي : أنت هتدخل القفص أثناء الجلسة بس وهتخرج بمجرد ما الجلسة تنتهي ، وده أمر روتيني بيحصل مع كل الناس ..

قلت له طيب ممكن تكلم العسكري مايدخلنيش القفص ..

المحامي قاللي ماينفعش اللي بتقوله ، ده قانون والعسكري لا يملك أنه مايدخلكش ..

رفعت عيني للسما وقلت يارب? ?

ودخل القاضي قاعة المحكمة والحاجب نادى وقال محكمة …
وبص القاضي في أسمي وبص في عيني بتأثر شديد وأنا كمان بصيت في عينية وأنا كلي ذهول ?

القاضي هو صاحب عمري وصديقي الغالي ..

طول عمرنا كنا على تختة واحدة .. هو دخل حقوق وأنا دخلت طب ..

القاضي مارضيش حتى ينادي على أسمي في المحكمة وقال بكل إحترام : الدكتور يتفضل !

وقفت قدامه وأنا مذهول من قوة المفاجأة ..

فقال : مش انتوا اتفقتوا على مصالحة ؟

قلت له وأنا مذهول : أيوة مظبوط ..

قاللي : طب إتفضل حضرتك ممكن تروح عشان مؤكد انك متعطل عن شغلك !

خرجت من قاعة المحكمة ورفعت راسي للسما وقلت له : أنا خجلان منك أوي ..

بقا انا بطلب منك تحنن قلب العسكري تقوم تبعتلي القاضي بنفسه !!!

أنت بابا إللي في السما !!!

ربنا قال
“اعطوا العشور وجربوني ” وانت متجرب يارب ❤❤

Comments

comments