إذاعة صوت الأمل الدولية الدولية international Voice Of Hope Radio
نصايح مهمة
مفيش حاجة في الدنيا تستاهل نزعل من بعض ونتخاصم ونكره ونتخانق .. علشان أيامنا شوية بخار بيظهر حبة قليلين ويختفي !
فيه يوم هنكون مفكرين أننا هنعيشه عادي وهيمشي زي كل يوم ..هنكون بنعمل كل حاجة بنصحى من النوم نعملها .. اكل وشرب وشغل واخبار وناس ومشاكل ومصاريف .. ومفكرين اننا هنخلد للابد وان الموت قريب من كل الناس الا ( أنا ) !.. بس اليوم دا هيكون مختلف ومش هيكمل زي كل يوم .. ﻷن الموت مبيديش انذار قبل ما ييجي .. بييجي زي الحرامي اللي مقرر ومخطط يسرق بيت وبيقتحمه مرة واحدة !
لما نموت مفيش حاجة هتفضل منا غير أعمالنا وكلامنا ! علشان كده لما نتخانق بلاش نقول لبعض كلام سلبي ..خلي بالك من كل كلمة بتقولها وقت الزعل .. ﻷن الموقف هيخلص والمشكلة هتتحل .. والكلام هيفضل يجرح ويوجع في اللي قدامك طول الوقت !
متفضلش بالسنين مأجل توبتك واعترافك وتناولك ومرواحك للكنيسة علشان معندكش وقت او علشان مشغول .. مفيش حاجة ف الدنيا تستاهل نضيع ابدية مبتنتهيش علشان كام سنة هنعيشهم عالأرض .. (( محتاجين نفووووق من الغيبوبة ونملا مصابيحنا بالزيت قبل فوات الاوان .. قبل الندم وصرير الاسنان )) …
الفلوس اللي دايما بتكون سبب المشاكل بين أقرب الناس !! (مش هي كل حاجة ) والسيارة الاخر موديل والكلية القمة اللي بتتمنظر بيها والأراضي والبيوت .. مش هتاخدهم معاك .. الكفن مفيهوش جيوب .. متضيعش عمرك ف اقتناء حاجات مش هتنفعك لما تقف قدام ربنا تقوله اصل ملقتش وقت اقرب منك علشان كنت بجمع فلوس علشان اجيب بدل العربية اتنين وبدل البيت فيلا ! الطموح والشغل والنجاح مش عيب لما يكون كل حاجة ف حياتنا واخدة حقها وليها وقت !
المحبة .. الناس اللي بتعلم ولادها أهم حاجة نفسك ومصلحتك وبيتك .. طظ في قرايبك ..دوس على صحابك .. دوس عاللي معاك ف الشغل .. متديش حد .. محدش يستاهل !! كنوز الدنيا كلها متستاهلش لمة حلوة مع ناس بتحب بعض .. ضهر وسند لبعض .. اللي بتعلموه لولادكم هما نفسهم هيعلموه لأولادهم .. بكره وبعده هتحصدوا الكره بين الاخوات وبين ولاد العم بسبب الأنانية ! المحبة قوية كالموت هي اللي بتسند وتتأنى وترفق وتتحمل كل شئ وتصبر على كل شئ مش الفلوس ولا المصالح ولا حب الذات !
ما يزرعه الإنسان إياه يحصد .. كل ما تريد أن يفعل الناس بكم افعلوا هكذا انتم أيضا بهم .. بالبلدي ( ربنا مبينساش كلمة بخ ) !! هتعامل مراتك وحش .. بنتك جوزها هيعاملها وحش وأختك جوزها هيعاملها وحش ..هتغلط في حد وتجرحه ربنا هيبعتلك اللي يردلك الجرح مش علشان ربنا بيعاقبنا بس علشان تحس بوجع الناس . هتخون هتتخان .. كله سلف ودين !
كله بيتغير ( الناس – الظروف – الأماكن – الصحة …) مفيش شئ ثابت غير الله .. متخليش حد ولا حاجة ف الدنيا تاخد مكانه .. لانه قال اللي يحب أي حد او حاجة في الدنيا اكتر مني فلا يستحقني ! هو بس اللي هتقدر تسند راسك عليه لما الدنيا تعند معاك ..
الكبرياء هي الخطية اللي خلت الملااااااك شيطان .
مفيش فرق بين غني وفقير ولا هندي وأمريكاني .. كل واحد في الدنيا غالي الله دفع فيه تمنه ..زيه زيك بالظبط .. محدش احسن من حد .. اللي انت مش شايفه بعنيك من كتر تكبرك .. ( الله بنفسه شايفه ) مهما ان كان وضعه الاجتماعي ! انت مش عارف بكره هيحصل أيه … عامل الناس كويس مهما ان كانت اقل منك الدنيا دواره ممكن في يوم تبقى مكانهم لو جه اليوم دا تلاقي اللي يعاملك كويس !
حاجات كتير في حياتنا عايشينها غلط لازم نصلحها مش لازم نستنى لما نموت او حد مننا يكون علشان نتغير .. الكلام ليا أول واحد …
القس / مجدى خلة
فايبر وواتس اب
009647502720873
