إذاعة صوت الأمل الدولية الدولية international Voice Of Hope Radio
انك تبقى عارف نقطة ضعف اخوك وتدوس عليها فده معناه انك انسان بدون قلب ، كائن بلا مشاعر
• هايفيد بإيه السؤال كل شوية ( مفيش حاجه جايه في السكه ) لشخص لسه ربنا ما أرادش يرزقه بطفل
تيجي ولا ماتجيش ، مالك انت ! هو اللي هايجي ده هايقاسمك في ورثك !!
• هايفيد بإيه السؤال كل شوية ( لسه مالقتش شغل )
ياسيدي يلاقي ولا مايلاقيش ، هو هاياخد كرسيك ولا هايقاسمك مرتبك !!
• هايفيد بإيه السؤال ( لسه برده ماجاش ابن الحلال )
شاغل بالك ليه يجي ولا مايجيش
• ابنك لسه مابيتكلمش ! ابنك طالع وحش لمين !
• ايه الحبوب اللي في وشك دي
• حاول تعمل دايت لحسن جسمك ضرب من كل حته
• مالك معصعصه كده ليه
• شعرك خفيف اوي
وغيرها كتير وكتير من الاسئلة البايخه اللي بتدل على تدني الحوار من شخص جاهل ومفتقد لكل معاني الانسانية والذوق والشعور
هايتكسفوا يقولولك في وشك وانت مالك ، هايتكسفوا يقولولك انك سخيف وتقيل وكائن سمج
وبينهم وبين نفسهم هاتتعاد الاسئلة في ذهنهم ١٠٠ مرة
والموضوع يكبر جواهم ويقتل فيهم الامل والرجاء ويولد اليأس
فاحتراما لشعورهم ومشاعرهم ، بلاش تتعمد تنهش فيهم باسئلة تبان من بره انك بتطمن عليهم
بس في الحقيقه بتدوس بيها ع الوجع ?
تعرف ايه افضل حاجه ممكن تقدمها للناس !!
انك تسيبها في حالها ?.
منقولة
القس / مجدى خلة.
